Phili 4 | KMG | STEP | Âgo biaŋfâc-nane, maŋnane ŋoŋere boc ecneekac, ŋoŋe hâcne eri bubiaŋfâc-nane, ŋoŋe Wofuŋtao qohota sanaŋkenšepieŋ, jorocfâc-mae.

Philippians 4

Paulo âgo babaficfâc-ticne jaŋere dâŋ

1 Âgo biaŋfâc-nane, maŋnane ŋoŋere boc ecneekac, ŋoŋe hâcne eri bubiaŋfâc-nane, ŋoŋe Wofuŋtao qohota sanaŋkenšepieŋ, jorocfâc-mae. 2 Euodia â Sintike ŋokac jahec jahe Wofuŋte erâ maŋ mocjaha erâ juzepirec. 3 Á babafic fâri-nane go ine ŋokac jahec hâcne hone maiŋ ejactezemec. Jahe mecne â Kelemento â âgo gâcne jaŋe Biŋebiaŋte giere dopecnumbiŋ. Ʒâŋe-jeŋic juju sanaŋte papia qizecko fofârekac.

Mu baafec dâŋ

4 Ŋoŋe Wofuŋte erâ šeri bubiaŋ manahuc junšepieŋ, no harierâ mupe, šeri bubiaŋ mananšepieŋ. 5 Wofuŋzi bâqiŋ-nâpokacte ŋic sasawa wamane ejarenšepieŋ. 6 Wiac irec me irec mana mezac mi ee maŋŋeŋicte dâŋ fuŋne fuŋne i Anutu daŋge nunumu ecnehuc mutaniŋkecnenšepieŋ. 7 Eme Anuture wama e ŋic mamana sirickeekaczi maŋ mamanasu-ŋeŋic qâzuckeme Kristore fosanaŋkeocmu.

8 Erâ âgofâc, dâŋ moc mupe: Wiac fârine â wiac araŋ bapanehec, wiac tiŋne â wiac ɋaɋacne, wiac hohone šiziwene â wiac mamana šiziwene, wiac eesaricne â wiac bubiaŋ bâbâfuane, wiac i sasaware henširiŋnehuc junšepieŋ. 9 No wiac mu qazuc â ŋaza ŋowatuc epe hone manac embiŋ, ijaha ehuc jupie Anutu wama runezi ŋoŋehec juocmu.

Paulozi iŋuc me iŋuc jume bame biaŋkewec

10 Ŋoŋe ŋondeŋne moc mâc juwareku ši nore mocwâc manasurâ buafec-ŋeŋicte ehâmo-narembiŋ, irec manape Wofuŋtao qacneme bubiaŋ kâcɋene manakopac. Ŋoŋe nore mamanasu i manasumbiŋ, mâc wiac enareniŋte hata basarâ quŋkembiŋ. 11 No kâroŋ qaŋarehuc mi mukopac, no wiac i me i basarâ mâc juhuc manape mi sâqoreekac. 12 No qafec qawahac juju me fofo dunduŋ fonareha juju, iŋuc me iŋuc juzo murâ sâcne jupemu. Nâ gapehec juju â natac qatac juju, mâriri faio juju â roroc faio juju, irec fuŋne mâmâc manaekopac. 13 Tâpiri nareme sanaŋkeekopac, ere erâ jupe bape sâcke-fâreekac. 14 Ŋoŋe ine busâqocko juhape ehâmo-narembiŋte manape biaŋkekac.

Paulo wiac râcne tahac embiŋ

15 Filipi haeonec ŋic ŋokac ŋoŋe manaŋgopieŋ, no Biŋebiaŋte gie fufuŋke dameŋko Makedonia mâreŋ behepoo kikefuŋ gâcnezi mâc juhapie ŋoŋe buc nohec nareŋ gareŋ embeŋ. 16 Erâ Tesalonike haeo juhape sahacte wiaczi dopecnuhuc jumbiŋ wâc. 17 No moneŋ mafare mi mukopac, mâc miti-ŋeŋicte fârine fuaocte mukopac, eme fârine izi ŋoŋeraopec hamârekao hâcne. 18 Ʒi wiac bâfuacnu-fârewec, bocjaha fonarekac. Epafoditozi ŋoŋeraonec wiac bafisi-nareme mâririhec epo jukopac. Ŋoŋe no wiac enarembiŋ, irec manape Wofuŋ taha bâzi biaŋ âsu mumundoŋnehec ecnembiŋ ekac. 19 Anutu-nane e mâriri bâbâfuazi Kristo Jesure erâ wiac hezu heŋareme hâmoc huriaŋ tâmiric juniŋmu. 20 Anutu Mamac-nâŋec erao ine mumuteŋzi mumuteŋ forašihuc juzejec sanaŋ. Jâmbomac.

Mumutara dâŋ

21 No Kristo Jesure erâ manasuc-ŋopakopac, i mitiŋic ŋokac jaza-fârenšepieŋ. Á âgofâc-nane nohec juŋgopieŋ jaŋe wâc manasuc-ŋopaŋgopieŋ. 22 Mitiŋic sasawa â Sisare ŋicfâc jaŋe wâc boc manasuc-ŋopaŋgopieŋ. 23 Wofuŋ Jesu Kristo ere aki anonoczi maŋ qâqâtâc-ŋeŋicko fofârezejec. Jâmbomac.